.png)
當我地杏晁新診所BB👶，啱啱裝修完無耐，終於可以開診時，就聽到黃爸叫救命，話＂大少，我腳板底🦶痛到行唔到啊＂，黃醫師就同黃爸講：唔使驚，應該係前排趕診所裝修交貨時，太忙，太辛苦，搞到足底既筋膜炎發作，等我黎幫你搞搞啦。而家黃爸又龍精虎猛咁趕第2單工程🔨啦。咁到底咩係足底筋膜炎呢？中醫又可以點處理呢，就等黃醫師為大家講解下。
足底筋膜炎係中醫角度屬於＂痹症＂既範疇，臨床上亦好常見。患者通常既表現為足跟又或者足底沿弓內側疼痛劇烈，嚴重時可以有放射痛至小腿又或者有腳踝水腫麻痹等。通常患者會覺得起床或者坐得耐🚽起身落地踩第一步會劇痛甚至唔可以掂地下，但行多幾步就可以減輕痛既感覺，但行得多時又痛過。
足底筋膜其實係厚實既結締組織形成既纖維帶，位置從內側結節同跟骨既前部開始，沿足底延伸至足趾底部，具有支撐足弓既功能。足底筋膜炎其實並唔係因為真係發炎🔥導致。其實主要係因為反覆勞損足底筋膜，令足底筋膜處於不停反覆既破壞同修復既循環當中，而受損既足底筋膜未能即時復原又要繼續支撐我地既日常活動，足跟或足弓所承受既壓力增加做成。所以足底筋膜炎多見於一D需要長期站立、長期行走或者體力勞動既工種例如銷售員，廚師等，亦多見於過重或者先天有扁平足、長短腳既病人，因為佢地既足跟足弓承受既壓力比正常人多，所以佢地既腳除左易有足底筋膜炎，仲會好易覺得腳部疲倦。另外，亦可以因為扭傷足踝肌腱後處理不當留有舊患所導致既。
中醫處理足底筋膜炎可以透過針灸、艾灸、推拿，配合中藥治療🌿，因為中醫認為＂不通則痛”，所以針灸一般用局部取穴疏通局部經絡氣血，例如太溪、昆侖、然谷、照海、太沖。另外，亦應顧及小腿，因為小腿既脛前肌、脛後肌、腓腸肌和腓長肌等肌肉，係維持足弓穩定既重要結構，如果呢幾組肌肉筋膜張力不等時會影響足弓所承受既壓力，所以針刺推拿時亦可以選取小腿既穴位例如地機、三陰交，懸鍾、陽陵泉等，亦可以透過艾灸足底既湧泉穴達到溫經散寒補腎既功效。
另外，黃醫師再教大家一D方法去預防，或者減輕足底筋膜炎既方法。我地平時可以倒一盤熱水🍵過腳眼位，切幾片姜，放少少鹽🧂去泡腳，每日泡大約15-20分鐘，令局部氣血通暢。運動方面，可以行埋牆邊，將腳背伸，腳尖貼牆，足跟掂地，做下壓腿，令小腿後側肌肉感覺到適當拉扯感，改善小腿筋膜張力從而放鬆足跟所承受既壓力。我地仲可以多D按摩足弓內側，同埋陽陵泉穴，因為陽陵泉係屬於＂八會穴＂既＂筋會＂，可以醫到一D筋腱既病變。之後黃醫師亦會介紹中醫針灸既一D特定穴比大家認識，希望今次介紹幫大家清楚D足底筋膜炎係咩一回事，及早求醫解決大家煩惱。