.png)
近排流感高峰期😷😷，明顯多左人「中招」。呢個時候「中招」，最大既問題就係好多時候都分唔清係中「肺炎」定係「流感」⁉️🤯
由於「新冠肺炎」經過長期既演變，變得越來越似「流感」，好多時候唔做檢測根本分辨唔出。但又因為「新冠肺炎」有一段潛伏期，所以早期做檢測又未必呈陽性，導致檢測變得如同雞肋般可有可無。
雖然兩者難以區分🤔，但係典型既「新冠肺炎」同「流感」仍然具有一定既差異性，值得我地留意並用來區分兩者。
👨⚕️首先，「新冠肺炎」既潛伏期一般會比「流感」長啲，如果感冒症狀係慢慢起，唔知幾時「中既招」，咁就係「新冠肺炎」既機會大啲。反之，如果感冒驟起，啱啱「攝親」就發病，咁就係「流感」既機會大啲。
👨⚕️其次，「新冠肺炎」偏向影響下呼吸道🌟，而「流感」偏向影響上呼吸道🌟。如果出現「心口翳住」，或者「抖氣唔順/抖唔到氣」，咁就係「新冠肺炎」既機會大啲。如果「打噴嚏，流鼻水，鼻塞」為主，咁就「流感」既機會大啲。此外，有唔少「新冠肺炎」既病人出現味覺/嗅覺異常😵，而該症狀罕見於「流感」。
對於中醫來講，區分「新冠肺炎」同「流感」並非必要的。因為我地針對既係「人」🕺 而唔係「病」🤒，重視既係「症狀」背後代表既「證」（例如：風寒定風熱，痰濕定血瘀等等），而唔係「症狀」本身。「新冠肺炎」又好，「流感」又好，當佢表現既「證」係一樣既，例如同樣都係「風寒」，咁我地用「疏風散寒解表」既藥就會有效。係呢個層面來講，中醫比起西醫治療「新冠肺炎」同「流感」更有優勢😊，因為無論病毒、細菌點樣演變，只要有症狀，有「證」可尋，中醫就能夠搵到相應既治療方法。
值得一提既係，好多人會有個錯覺，認為西藥醫感冒一定比中藥快。之所以有呢個錯覺，係因為西藥多數係針對症狀，抑制或減少病征，病邪既排除，身體機能既康復，主要都係靠自身免疫來做。舉個例子：病人有發燒，俾退燒藥，但導致發燒既原因（免疫系統同病毒或細菌打仗），要身體自己處理。病人有咳嗽，俾止咳水，但導致咳嗽既原因（身體排走病毒或細菌既生理反應），要身體自己處理。
而中藥之所以需時較耐，係因為中藥針對既係「症狀」背後代表既「證」。同樣例子：病人有發燒🥵，有咳嗽，如果辨「證」為「風寒」，即係我地認為病人既症狀係由「風寒」所引起，當我地處理左「風寒」，相關既症狀自然會消除。所以中藥要做既野唔係退燒，唔係止咳，而係「疏風散寒解表」，簡單而言即係幫助身體排走、驅除「風寒」之邪，而呢個過程需要一定既時間，比起處理症狀來講自然更需時費力。