top of page

口腔潰瘍一定係熱氣🔥嗎?






👨:「醫師我又生左痱滋啊,我去飲劑廿四味清清先。」

👨‍⚕️:「等等,不如坐低比我睇下先決定飲唔飲廿四味🧉啦。況且廿四味咁寒涼,飲完你脾胃又好易出現問題架。」


  其實生痱滋,除左真係因為食得多熱氣🔥、煎炸、辛辣,而令脾胃濕熱做成既「實火」之外,有更多既人其實係因為長期夜訓,長期操勞,日積月累做成既「虛火」所導致,「勞」字本身就帶住兩個火,所以我地長久勞累😫,就會消耗我地人體自生滋養身體既津液,導致津虛液少,血弱營虧。


  人體本身陰陽津液都平衡時候,自身既水火氣血都唔會出現偏盛偏虛既情況,但當陰液減少時,陽氣就會亢奮,出現火旺🔥🔥既症狀,就會容易出現口乾口苦,口腔潰瘍,口乾咽燥,失眠煩燥,夜晚頻頻要飲水解渴等等既情況。雖然以上既症狀都係火旺既症狀,但根源其實係我地自身既陰液少左,所以仲會見到面色痿黃無神🥱,面無血色,肌膚乾燥欠潤等等既情況。


  治療火旺既症狀無錯係應該用苦寒既藥物去清熱,但虛火就唔應該純用苦寒清熱之法,飲完廿四味🧉,無錯,你會覺得果一刻係無咁燥熱,但其實只係治標唔治本既方法,所以唔好見到自己生痱滋就一定覺得要去飲涼茶,加上本身香港人大多數脾胃虛弱🤢,飲完更傷又會有第二個問題出現。


  治療虛火除左要養陰清熱並用之外,仲可以用適量既甘溫補益法,去溫暖我地既脾胃,因為脾胃係我地既後天之本,係陰血津液生成既重要元素,但有時病人食完藥會話D藥食完好燥,痱滋係少左但口乾口苦會多左,好多時病人就會選擇唔食或者又食其他寒涼既食物去處理。其實係大錯特錯,因為呢種口乾口苦既表現係陰病轉陽,疾病向愈既一種表現,只要我地飲少少溫水🥤去和解就可以,所以點解我地成日叫病人除左要注意飲食起居作息既習慣,仲要飲返D溫水。


  我地仲可以試一條簡單既服餌方📒:蜂蜜蛋清湯,其實就係蜂蜜加蛋白加熱開水攪拌而成,呢條方出自<<湯液經法>>,可以治療虛火上炎所致既口腔潰瘍,咽喉腫痛,失眠煩燥,口乾口苦等。「蛋白」係<<名醫別錄>>入面記載為:「微寒,療目熱亦痛,除心下伏熱,鵪黃疸,破大煩熱」。對於補津液清虛熱既效果非常好,而且成條方簡單方便係屋企就做到,如果各位真係長期捱更抵夜而有出現「虛火」既症狀,不妨一試。

16 views0 comments
bottom of page